SINOPSE DA NOVELA "A VIAXE DO CASTREXO"

   

     “A viaxe do castrexo” é unha novela histórica de aventuras e amor, que se desenvolve no ano 137 a. C. no marco xeográfico comprendido entre o poboado castrexo do monte do Castro de Vigo e a actual cidade de Braga, en Portugal.

    Nela, o protagonista, un xove e humilde pescador, tras ser condenado a morte inxustamente, consigue escapar do poboado. Na súa fuxida, despois de múltiples avatares, chega ata o territorio da tribo dos brácaros, onde se ve inmerso nos enfrontamentos coas lexións romanas que, comandadas polo cónsul Décimo Xunio Bruto, chegaron a estas terras desde o sur do río Douro coa intención de conquistalas.

    Este libro é a historia dunha viaxe, tanto no espazo xeográfico coma no interior do protagonista.

 

    É un canto á perseveranza, á tenacidade, á forza de vontade e ao amor. Todo isto adubado co choque de culturas que supuxeron os primeiros encontróns que se produciron entre os conquistadores romanos e os pobos castrexos que habitaban o noroeste da península Ibérica.

 

Ruinas do poboado castrexo no monte Tegra - Foto: Alexandre Plaza

               

    A publicación desta novela está prevista cara a finais do ano 2022 pola editorial Galaxia.